Ikipe y'Igihugu y'umupira w'Amaguru y'Abagore, kuri uyu wa mbere tariki ya 10/02/2025 yatangiye imyitozo yiteguru imikino 2 izakina n'ikipe y'Igihugu ya Misiri mu gushaka itike yo gukina igikombe cy'Africa kizabera muri Morocco mu mwaka wa 2026.
Iyi kipe yari yarahawe umutoza w'ikipe ya Rayon Sports y'abagore arinawe byagaragaye ko yahamagaye iyi kipe ariko ntihatangajwe impamvu atariwe wakomezanije nayo ahubwo kuri uyu mugoroba nibwo hatangajwe ko Casaa Mbungo Andre ariwe mutoza mukuru.
Abakinnyi bose bahamagawe uko ari 28 barahari nta kibazo bafite, ikipe ikaba irimo gutozwa na Cassa Mbungo Andre n'abatoza 2 Mukamusonera Theogenie nk’umutoza wungirje wa mbere na Umunyana Seraphine nk’umutoza wa kabiri wungirije ndetse na Safari Mustapha Jean Marie Vianney nk’umutoza w’abanyezamu na Yadufashije Jeannine wongerera abakinnyi ingufu.
Umukino wa mbere u Rwanda ruzawukinira i Kigali tariki ya 21/02/2025 uwo kwishyura uzaba tariki ya 25/02/2025 i Cairo mu Misiri.
Amafoto: FERWAFA