Kuri Kigali Pele Stadium, kuri iki cyumweru tariki 11 Gicurasi 2025, ikipe ya Police FC yari yakiriye Rayon Sports mu mukino w’umunsi wa 27 wa Shampiyona y’ikiciro cya Mbere mu Rwanda. Ni umukino watangiye Saa moya (19:00’), uyoborwa na Nsabimana Celestin, yungirijwe na Habumugisha Emmanuel na Mukirisitu Ange Robert, mu gihe umusifuzi wa kane yari Mulindangabo Moise, naho komiseri w’umukino ari Munyanziza Gervais.
Amakipe ageze mu kibuga, habayeho gufata umunota wo kwibuka ku nshuro ya 31 abazize Jenoside yakorewe Abatutsi mu 1994.
Nsabimana Celestin yahushye mu ifirimbi, Rayon Sports itangiza umupira, Biramahire Abeddy akinana na bagenzi be. Umukino watangiye Rayon Sports ikora amakosa. Ku munota wa 3 Youssou Diagne yakiniye nabi Iradukunda Pacifique wari umutwaye umupira, agiye kwinjira mu rubuga rw'amahina. Ishimwe Christian ahana ikosa, umupira awutera mu rukuta rw'abakinnyi ba Rayon Sports. Ku munota wa 4 Ali Serumogo yakiniye nabi Mugisha Didier wari winjiye anyuze ahagana muri koruneri. Christian Ishimwe yongera guhana ikosa, umunyezamu Ndikuriyo Patient akiza izamu ndetse atabarwa na bagenzi be.
Ku munota wa 7 Bugingo Hakim yahinduye umupira mwiza mu rubuga rw'amahina, Aziz Bassane akinira nabi Ishimwe Christian, umusifuzi asifura ikosa. Ku munota wa 18 Rukundo yakiniye nabi Mugisha Didier, ikosa rirahanwe, Bassane akinira nabi Mandela umusifuzi Celestin amwereka ikarita y’umuhondo. Police FC yahannye ikosa ariko umunyezamu Patient akora ku mupira ujya muri koroneri yatewe ntiyagira icyo itanga.
Ku munota wa 27 Aziz Bassane yinjiranye umupira anyuze kuri Msanga na Christian, ateye mu izamu Chimeze awushyira muri koruneri. Yatewe na Muhire Kevin ariko Police FC yirwanaho. Ku munota wa 30 Rayon Sports yahushije uburyo ku mupira Muhire Kevin yahinduriye Abeddy Biramahire ashyizeho umutwe uca hejuru y’izamu. Ku munota wa 31 Ishimwe Christian yatunguye Ndikuriyo Patient arekura ishoti, Patient awukubita ibipfunsi. Ku munota wa 36 Rukundo Abdulhaman yakuruye Mugisha Didier wari umucikanye umupira ahita ahabwa ikarita y’umuhondo. Ku munota wa 45 Muhire Kevin yahawe ikarita y'umuhondo nyuma yo gukinira nabi Msanga Henry. Umusifuzi wa Kane, Murindangabo Moise, yerekanye umunota w'inyongera. Ku munota wa 45+2 asifura ko igice cya mbere kirangiye. Cyarangiye amakipe yombi anganya ubusa ku busa (0-0).
Igice cya kabiri cyatangiye Rwaka yinjizamo Ishimwe Fiston asimbuye Biramahire Abeddy. Ani Elijah atangiraza umupira mu gice cya kabiri, asubiza inyuma kuri bagenzi be. Ku munota wa 49 Henry Msanga yakiniye nabi Aziz Bassane inyuma y'urubuga rw'amahina. Rukundo ahana ikosa, umupira ugonga urukuta ujya muri koruneri. Ku munota wa 50 Aziz Bassane yaguye mu rubuga rw'amahina akuweho umupira na Ishimwe Christian, umusifuzi Nsabimana Celestin avuga ko nta kosa ryabaye. Ku munota wa 57 Richard Kirongozi yinjiye mu kibuga asimbuye Chukwuma Odili.
Ku munota wa 58 Muhire Kevin atwaye umupira Mandela, awuhinduye usanga Rukundo atera ishoti rifata inshundura ntoya. Ku munota wa 62 Ani Elijah yakinanye neza na Ngabonziza, baha umupira Kilongozi Richard atera ishoti rikomeye, rica ku ruhande rw'izamu. Ku munota wa 66 Ishimwe Fiston yaririmbishije abareyo Murera, nyuma yo gutsinda igitego n’umutwe. Ku munota wa 72, Mugisha Didier yasohotse mu kibuga nyuma yo kuvunika asimburwa na Muhozi Fred. Ku munota wa 74, Police FC yahushije uburyo ku mupira Ani Elijah yaherejwe na Fred Muhozi ateye ishoti umupira uca iruhande rw’izamu.
Ku munota wa 78 Rukundo yeretswe ikarita y’umutuku nyuma yo guhabwa ikarita ya kabiri y’umuhondo ku ikosa yakoreye Ndizeye Samuel. Ku munota wa 85 Omar Gning yinjiye mu kibuga asimbuye Aziz Basane. Ku munota wa 89 Souleymane Daffe yasimbuye Ndayishimiye Richard. Ku munota wa 90 Ndikuriyo Patient yatindije umukino bimuviramo guhabwa ikarita y’umuhondo. Umusifuzi wa kane yongeyeho iminota 5, ku munota wa 90+2 Omar Gning yakuyemo umupira watewe na Richard Kirongozi wanibwiraga ko yishyuriye Police FC. Habura amasegonda 45 ngo iminota 5 y’inyongera irangire, umusifuzi Celestin yasifuye ku umukino urangiye. Abakinnyi ba Police FC barimo Kapiteni wayo, Ndizeye Samuel, bagiye kuburana ku basifuzi bababwira ko babibye. Umutoza Mashami arabakurura abasaba kujya mu rwambariro.
Nyuma y’umukino Henry Msanga wa Police FC yahawe ikarita itukura, nyuma yo gushyamirana n'abari bayoboye umukino.
Uko imikino w’umunsi wa 27 yagenze
- AS Kigali 0-1 Kiyovu Sports
- Mukura VS 1-1 Bugesera
- Musanze FC 1-1 Gasogi United
- Marine FC 2-1 Vision FC
- APR FC 3-1 Amagaju
- Rutsiro FC 1-2 Muhazi United
- Police FC 0-1 Rayons Sports
Kuri uyu wa Mbere, tariki 12 Gicurasi 2025
- Gorilla FC kuri Kigali Pele Stadium izakira Etincelles saa cyenda zuzuye.
Ku rutonde rwa shampiyona Rayon Sports iri ku mwanya wa mbere n'amanota 59, ikurikiwe na APR FC n'amanota 58, ni mu gihe ku mwanya wa 15 hari ikipe ya Muhazi United n'amanota 27 naho ku mwanya wa 16 hakaba hari ikipe ya Vision n'amanota 20.
Abakinnyi ba Police FC babanje mu kibuga: Niyongira Patience (GK), Ndizeye Samuel (C), Ishimwe Christian, Ngabonziza Pacifique, Mandela Ashraf, Ani Elijah, Chimeze David, Mugisha Didier, Msanga Henry, Iradukunda Simeon, na Chukwuma Odili.
Abakinnyi ba Rayon Sports babanje mu kibuga: Ndikuriyo Patient (GK), Serumogo Ali, Bugingo Hakim, Youssou Diagne, Nshimiyimana Emmanuel 'Kabange', Niyonzima Olivier 'Seif', Ndayishimiye Richard, Rukundo Abdul Rahman, Muhire Kevin (C), Biramahire Abeddy, na Aziz Bassane.
Amafoto: Rayon Sports & RPL